雙紅會前狂寸利物浦　蘇B：同曼聯冇得比

英超「雙紅會」如箭在弦，今晚深夜就會於晏菲路進行。曼聯領隊蘇斯克查賽前大打口水戰，認為利物浦雖然表現出色，但一隊超級勁隊，係要經年累月、一次又一次咁成功，現時利物浦仲未有耐可以進入呢個層次。

利物浦自上季開始進入巔峰狀態，以97分成為英超史上最強亞軍，又連奪歐聯、歐超盃及世冠盃錦標，本季聯賽更打出20勝1和成績破盡紀錄，奪取首個英超冠軍可謂形勢大好。雖然曼聯目前已落後紅軍27分，但領隊蘇斯克查始終認為死敵未係頂尖勁旅，同費格遜麾下嘅曼聯更不可同日而語。

「如果宏觀啲睇，超級勁旅係可以一次、一次又一次成功，冇一隊可以同費格遜麾下嗰支曼聯相提並論。但我必須承認，高普於利物浦嘅工作係出色嘅。現階段高普順風順水，但其實今季只係打咗一半多啲，仲有好多比賽要踢。」

「利物浦近38場聯賽，33勝5和取得104分，的確係個唔錯球季。紅軍踢得唔錯，或者有機會成3冠王，但就睇吓利物浦5月會有咩成績，都係嗰句，佢哋仲有大把硬仗未踢。」