【人物誌】不老傳奇　祖亞昆再破紀錄

西甲貝迪斯尋晚喺主場意外以3比0大炒今季表現神勇嘅皇家蘇斯達，其中貝迪斯陣內嘅38歲老將祖亞昆又有入波，繼續書寫佢嘅不老傳奇！

上月先同貝迪斯續約多一季嘅祖亞昆，上月對畢爾包大演帽子戲法，已經成為咗西甲最老連中三元球員紀錄，舊紀錄係由皇馬傳奇迪史提芬奴保持。同時又已經連續20季入波嘅佢，連同尋晚嘅「士哥」，今季累積喺西甲已入7球，仲成功打破自己過去同期最多入球紀錄，之前佢喺2002/03球季打完20輪入6球，估唔到嚟到38歲，反而同期仲入多球，認真犀利。

嚟緊，呢位西班牙名將仲要向自己喺2003/04球季造出嘅單季入球數字紀錄追趕，佢喺2002/03年球季，全季攻入9球兼有12次助攻，而今季喺尚餘18輪之下，「昆哥」都已錄得8入球2助攻，睇嚟要打破個人單季入球紀錄應該係指日可待。