【賽後解碼】阿仙奴曙光　18歲天才唔止入波

英超豪門近年玩青春風暴，近2季湧現唔少超新星，而喺眾多嘅好波新人當中，總有少數係令人覺得與別不同嘅真‧天才，阿仙奴18歲翼鋒加比爾馬天尼利就係呢種球員。阿仙奴喺奧巴美揚停賽呢2場，阿迪達都用加比爾馬天尼利代替左翼位置，佢亦連續2場英超入波，將今季總入球數字增加到10球(1,120分鐘上陣時間)。

事實上，入球數字唔係馬天尼利最「與別不同」嘅地方，更加重要嘅係呢位天才攻擊手，完全唔介意做大部份攻擊球員都討厭做嘅事──防守，馬天尼利每場比賽都不惜氣力追纏對手，鬥心、體能都明顯喺一眾隊友之上，唔好忘記，佢只係得18歲。

阿仙奴今場早早就打少個，但馬天尼利錄得全場最高嘅26次衝刺，全場第2多嘅艾馬臣柏美尼有幾多次，只得馬天尼利一半多少少嘅14次。喺惡劣嘅環境之下，阿仙奴今場全隊都踢出唔錯嘅團結性，但真正引領球隊反撲嘅人，就係馬天尼利，再提提大家，佢只係上年踢緊巴西丁組嘅18歲新人。