【東體爭議】炸彈人Combo　神仙難教

阿仙奴自從阿迪達上任後，整體面貌即使唔算脫胎換骨，但屬於一次大躍進，只可惜喺戰績上只屬「略有改善」，最大問題就係球員質素同兵源所限，今場對車路士再用梅斯達菲同大衞雷斯呢個中堅炸彈人Combo，出事亦係意料之內。

梅斯達菲季前已經幾乎被賣走，但隨住張林張伯斯重傷收咧、柏柏斯達夫普路斯因病缺陣、洛賀丁重傷初愈狀態未復下，梅斯達菲再一次成為中堅主力，就算佢喺全場89分鐘表現不過不失，但「炸彈人」屬性一開就已經將球隊推入絕境，今場嘅自殺式回傳，就累阿仙奴失波兼打少個。

大衞雷斯今場首次倒戈車路士，一開波已經畀車迷狂噓，面對梅斯達菲嘅「靠害」，大衞雷斯錯誤選擇犯規，出現「食全餐」(紅軍+12碼)嘅最惡劣後果。不過講句公道話，大衞雷斯喺阿迪達執教後表現唔差，今場好大程度係畀隊友炸彈炸死。

阿仙奴近期防守體系已經改善好多，大幅減低對手射門數字，不過面對球員不斷嘅「個人犯錯」，真係神仙都教唔掂。