加里夫巴利回歸熱刺　賠率暴跌莊家封盤

1月轉會市場只剩1個星期多啲，英國、西班牙媒體爆料熱刺正準備重大收購，目標直指皇家馬德里嘅加里夫巴利！西班牙《阿斯報》報道，熱刺主席利維同皇家馬德里會長皮里茲日前秘密會面，商討轉會可能性，著名博彩公司Paddy Power過去1日更收到多宗關於巴利重返熱刺嘅巨額投注，依家直頭熱到封盤！

西甲著名記者Juan Sanz喺佢個節目爆料，利維同皮里茲嘅會面談論過多位球員，而加里夫巴利就係重點，熱刺已經表達想帶呢位威爾斯國腳返英超嘅心意，領隊摩連奴對巴利向來情有獨鍾，之前教曼聯嗰陣已經想簽佢，依家嚟到熱刺亦冇打消合作念頭。

關於熱刺收購巴利，Paddy Power過去1日收到多宗巨額投注，令巴利重返熱刺賠率喺周二(21號)由4倍急跌至1.5倍，去到周三(22號)更加正式封盤！加里夫巴利喺2007年至2013年間效力熱刺，之後以當時世界紀錄嘅8,500萬鎊轉會費加盟皇馬。