兩代日本天才較量　香川VS久保有結果

西班牙盃32強尋晚上演一場「日本打吡」，由西乙球隊薩拉戈薩主場對西甲馬略卡，雙方陣中都有一名日本國寶級球星，分別係主隊嘅前多蒙特兼曼聯中場香川真司，以及由皇馬外借去馬略卡嘅天才小將久保建英。最終結果證明薑係老嘅辣，30歲嘅香川完勝18歲嘅久保！

場波最終由薩拉戈薩以3比1取勝，固然係代表香川嘅勝利，而事實上，單論今場表現，都一樣係以香川明顯佔優。皆因呢位前曼聯中場今場既為薩拉戈薩先開紀錄嘅入波交出助攻，同時仲有一次罰球射中楣，表現相當搶鏡。相反，久保建英今場好似完全唔入局，踢足90分鐘都冇腳好波，今次真係徹底輸畀前輩。

值得一提，今場賽前喺球員通道，「大師兄」香川真司都主動走上前去拍吓「小師弟」久保建英，兩個人之後再握吓手吹咗幾句，相當老友，相信日本球迷睇見個場面都幾感動安慰。