撲救率英超最低!車仔勢賣阿列沙巴拿加
車路士近期聯賽表現低迷,繼被紐卡素絕殺後,剛又被10人阿仙奴逼和2:2,雖仍排英超第4,但實際演出的確於水準以下,門將阿列沙巴拿加更成重點受批評對象。比起排第1利物浦門將艾利臣比加嘅84.8%撲救率,呢名西班牙國腳竟得53.6%,成為英超最曳。據英媒報道,車仔將於季尾賣走佢,搵般尼英格蘭國腳樸比代替。
對阿仙奴一仗,車仔自30分鐘就多打1人,全場佔盡優勢,但阿仙奴全場2次起腳,竟然就入2球,最終車仔痛失2分。賽後領隊林柏特就批評阿列沙巴拿加唔夠氣勢,而且用腳處理生波緩慢;而於鬥阿仙奴賽前,有記者問到會否考慮將阿列沙巴拿加貶為後備,林伯表示如果有需要,佢必定會咁做。
阿列沙巴拿加18年以7100萬鎊加盟車仔,首季表現穩打穩紮,但本季明顯慌失失,據報道林柏特已忍夠佢,將於季尾將佢賣走,買入般尼樸比頂替。樸比今年27歲,身高1米91身材勁好,18年已入俄羅斯世界盃英格蘭大軍,目前有2頂喼帽。早前鬥李斯特城,樸比就撲出占美華迪12碼,帶領般尼反勝2:1,剛鬥曼聯亦正選上陣。