肺炎肆虐　中國單車隊入住香港體院惹擔心

武漢肺炎疫情嚴重，持續擴散，正當香港社會各界齊為抗疫努力，今日卻傳來消息，中國單車隊一行二十多人日內分批到港，已先後入住沙田香港體育學院進行訓練，即時引起港人關注，更替同樣會喺體院工作或受訓嘅香港運動員及職員擔心。

據知，中國單車隊其實喺多月前已經計劃好今次來港訓練，只係之前因為香港社會局勢不穩同簽證問題一度擱置。直到上星期，中國單車手終於辦妥簽證，由本周一起陸續到港，當中大部份人是由北京前來，由訓練基地直去機場再飛來香港，其他則係由加拿大出戰完場地單車世界盃後先來港。

對於外界關注，香港體院回應《東網體育》表示，國家隊對運動員嘅健康及衛生要求非常之嚴格，中國單車隊來港前已於北京進行封閉集訓，經評估後，可以喺體院進行訓練，到達體院入住前亦必需配戴口罩及測量體溫。此外，國家隊隊員及人員入住體院後，更需要嚴格遵守體院嘅防疫守則，包括要多洗手，每日量體溫同戴口罩等，並且當一有發燒、咳嗽、流感或任何武漢肺炎病徵等，都要立即就醫並向運動醫學中心報告。至於香港單車選手李思穎則表示：「據悉中國單車隊有嚴格的健康監控，問題應該不大。」