本田圭佑登陸巴甲　要求裝甲車保命！

日本國寶級球星本田圭佑終於有班落，同巴甲保地花高簽約到本年年尾。33歲嘅本田圭佑一直希望回歸綠茵場，早前就喺Twitter公開叫曼聯簽佢，話1蚊人工都唔會收，如今終於達成願望有波踢。不過呢次本田加盟就有條件，佢勁搞鬼地要新東家畀部裝甲車佢用，因為里約熱內盧實在太危險！

保地花高係本田圭佑職業生涯中第8支球隊，上年11月佢加盟荷甲維迪斯，但就因為同球會鬧翻，留咗6個星期就離隊。但佢今次唔使等好耐，就同保地花高達成協議，以自由身加盟到2020年年尾。

眾所周知里約熱內盧治安勁曳，每10萬人就有39人被謀殺，本田圭佑為保命仔，簽紙前就認真咁向球會要求，希望得到一架裝甲車，保地花高亦答應佢嘅要求。保地花高已喺官方Twitter宣布簽入本田圭佑，仲用上Gameboy同《寵物小精靈》嘅卡通人物介紹佢出場，認真過癮。