神級控傳堅精彩!法明奴助攻戴帽

2020年02月02日 02:12
東網電視
更多新聞短片
(Getty Images)
利物浦主場大數修咸頓4:0,如果冇睇波齋睇入球者,梗係以為梅開二度嘅穆罕默德沙拿係今仗最佳球員,但事實上羅拔圖法明奴演出更佳,今仗大演助攻帽子戲法,其中2個更係世界級傳送。有咁嘅表現,今季未喺晏菲路入過波又如何?
利物浦上半場表現欠佳,唔落後算有運,換邊後亦幾乎畀丹尼艾格斯博得12碼,利物浦處於劣勢下,全靠法明奴靈氣迫人打破僵局。呢名巴西國腳於左路人叢中,第一時間後腳傳被阿歷士張伯倫建功,堅係盡展功架。
利物浦入第2球仲精彩,當時阿歷山大阿諾特大腳解圍,個波九樓咁高飛落嚟,但法明奴右腳一黐仲順勢推前個波,再絕妙拗身回後,佐敦軒達臣空晒輕易射入。對比起完場前交橫予沙拿門前射入,頭2個助攻堅世界頂級。今戰助攻戴帽後,法明奴自15年加盟後上陣228次,助攻數字已達51次,喺呢4年來冇一個紅軍球員比佢助攻更多,屬利物浦助攻王。