卡利奧斯又被棄用　今次唔關派膠事

德國「膠龍」卡利奧斯2年前歐聯決賽瘋狂「派膠」，一戰成名，連累利物浦痛失冠軍，佢2018年8月被紅軍外借去土耳其球隊比錫達斯之後，場上表現都係麻麻，近期仲因為場外問題，面臨被比錫達斯踢走。

事緣卡利奧斯早前同女友Sophia Thomalla分手之後，精神大受打擊，被人影到經常流連夜店，放縱自己。最大問題係影響比賽表現，卡利奧斯自從上年11月以來，未試過喺比賽保持不失球，令比錫達斯高層非常不滿，預料今夏借用期屆滿之後，就會還畀利物浦，甚至提早雪藏佢，以免佢又累事。

卡利奧斯曾經講過，希望可以重返利物浦效力，但以佢現時表現，恐怕高普唔會收回佢，預料就算卡利奧斯今夏返回紅軍，好大機會又被外借，甚至出售。