球員放假做乜好　譚仔美臣玩雜技吸Like

數據最真實，刨波不二法門，彩報電子版周二、五更新：https://win.on.cc/epaper/archive.html　

英超今季開始有歇冬，球員難得有得抖吓，唔使比賽有乜好做？車路士2位小將譚美阿巴謙及美臣蒙特，各自拍咗條短片放上網，內容同樣係足球雜技，而且各有神奇之處，成功吸引網友圍觀。

22歲嘅譚美阿巴謙已經成為車路士主力，今季上陣35場入15球，射術愈嚟愈純熟，而佢自拍短片嘅表演，就係喺泳池邊，將個足球用腳射入泳池另一邊嘅籃球籃入面，最難得係，呢條片係佢自己拍嘅，畫面係第1身。

21歲嘅美臣蒙特係林柏特契仔，今季同樣上陣35場，不過佢踢中場所以僅入5球，佢嘅短片表演，係射罰球，當個波飛埋龍門口之際，場邊嘅助手拋另一個波出嚟同美臣個波相撞，然後兩個波分開飛向龍門左上角同右上角嘅窿入面，難度分滿分。

2位車仔小將原來都係雜技高手，聯賽重開值得畀多啲掌聲佢哋。