巴黎開超越尼馬薪酬　麥巴比肯留低嗎？

數據最真實，刨波不二法門，彩報電子版周二、五更新：https://win.on.cc/epaper/archive.html　

麥巴比與巴黎聖日耳門尚餘2年合約，早前有報道指皇家馬德里同麥巴比已達成個人協議，會在今夏或明夏過檔，不過PSG當然唔會乜都唔做，西班牙傳媒報道，PSG為咗留住麥巴比出大招，就係開出超越尼馬嘅薪酬，用行動證明麥巴比係隊中1哥，希望佢答應續約。

《馬卡報》報道，為抗衡來自皇馬嘅挖角，PSG多次嘗試同麥巴比續長約，而且事事向麥巴比作出遷就，連早前法甲賽場上發生主帥杜曹與麥巴比衝突事件，會方都火速平息，希望麥巴比留隊。

為吸引麥巴比續約，PSG開出與尼馬等同嘅3500萬歐元年薪畀麥巴比，但麥巴比已拒絕，因此下次再討論續約，PSG會將薪酬向上調整，開出超越尼馬嘅薪酬，有報道指年薪達到4100萬鎊(約4.1億港元)天價，供麥巴比考慮。