【阿King】曼聯唔使換帥 只需要C朗

2020年02月14日 12:15
東網電視
更多新聞短片
數據最真實,刨波不二法門,彩報電子版周二、五更新:https://win.on.cc/epaper/archive.html 
近期有關曼聯將於今夏換帥、增兵嘅消息此起彼落,但由2013年費格遜退休至今,紅魔鬼經歷多次換領隊,無論係由費Sir欽點嘅同鄉莫耶斯,亦或名帥如尹戈爾、摩連奴,甚至依家用埋流住曼聯血液嘅名宿蘇斯克查,結果都係換來一句:「咪一X樣!」
至於買人方面,天價收購保羅普巴、盧卡古、以至用50萬鎊周薪簽入阿歷斯山齊士,但同樣失敗。由此可見,曼聯不缺錢、不缺人、只缺靈魂。
以往費格遜係曼聯嘅靈魂,佢唔需要靠大牌球星,一樣可以帶領稱霸英超,以至歐聯,就係憑個人感染力,影響每一位球員,令佢哋發揮出小宇宙。可惜費Sir已無法出山,當今球壇之中可以喺曼聯發揮呢個靈魂角色,只有C朗。
C朗喺2016年歐國盃決賽早段傷出,仍然喺邊場扮演主帥角色,指揮隊友比賽,盡顯領袖角色。佢加盟祖雲達斯後,喺隊中領袖角色比教練沙利更鮮明,即使已經35歲,狀態仍然似廿歲出頭,可以「反地心吸力」飛頂入網,仲已連續10場意甲入波,創祖記紀錄,周五(14日)凌晨意大利盃又補時建功逼和AC米蘭,呢種就係魔性。
年齡對C朗而言,只係一個數字,唔會限制球員生涯,曼聯就算高價簽佢,亦唔使驚太快「折舊」,同埋唔好忘記就算C朗唔踢得,佢喺邊場、更衣室都可以發揮領隊角色,一份人工做兩人工作,絕對抵到爛。
蘇斯克查係一位弱勢領隊,更加無阻C朗自由發揮,正如伊巴謙莫域所講,C朗加盟祖記根本唔係尋求新挑戰,應該好似佢返A米拯救球隊先算係,所以C朗都係時候考慮重返曼聯,做終極救世主,為曼聯搵番個靈魂。