同巴塞爭美斯好拍檔 一原因皇馬可截胡

2020年02月14日 22:30
東網電視
更多新聞短片
(Getty Images)
意甲國際米蘭嘅阿根廷前鋒拿達路馬天尼斯今季表現出色,已經成為唔少頂級大球會今夏嘅獵物。據知,西甲班霸巴塞因為有美斯在陣,對簽入呢位美斯喺阿根廷國家隊嘅好拍檔一直信心十足,早已經當佢正佢係半個自己人。不過,來自阿根廷TyC電視台消息,原來皇馬都打算加入戰團,而佢哋爭取拿達路加盟最大籌碼,竟然就係同美斯有關,事關美斯同巴塞高層近排關係麻麻,隨時走人,到時拿達路都未必肯去巴塞囉!
今日嘅《世界體育報》用咗拿達路馬天尼斯做頭版,話佢係巴塞今夏嘅頭號目標,兼「未來蘇亞雷斯接班人」。報道仲指出,拿達路嘅1.11億歐元買斷合約價,對巴塞嚟講唔算過份,加上蘇亞雷斯已經開始年紀大,拿達路一旦加盟可以直接取代踢正選;最重要係美斯同佢一直喺國家隊合作愉快,
不過,今日阿根廷TyC電視台就指出,皇馬除咗同樣肯畀出1.11億歐元買斷合約價外,仲肯幫仍開出一份高達1,400萬歐元年薪嘅合約,喺條件唔差得過巴塞情況之下,其實「銀河艦隊」今鋪爭人未必輸梗。
至於依家最關鍵一個問題,就係近排爆出咗美斯同巴塞高層艾比度不和消息,講到美斯甚至可能會喺今夏跳出合約繼而自由轉會,而一旦美斯離開巴塞,拿達路最終會點揀,根本冇人知,到時巴塞想執靚條鋒線,難度又大大增加。