【藍月墮落】黑客建奇功 爆曼城醜陋內幕

2020年02月15日 03:30
東網電視
更多新聞短片
曼城被歐洲足協重罰禁止參加歐洲賽2年,唔少中立球迷都話覺得「大快人心」,因為曼城過去12年買人嘅「燒錢」程度,的確好難想像點樣可以合符「財政公平」呢4隻字,大部份人都認為歐洲足協所謂「財政公平條例」得個講字。不過,多次爆出足球壇黑暗內幕嘅德國《明鏡周刊》,2018年披露嘅「足球洩密」文件,就成為歐洲足協「打老虎」嘅根基。
當年《明鏡周刊》公開多份由黑客竊取嘅秘密文件,顯示曼城班主文梳亞利用唔同公司,直接將資金以贊助費形式注入球隊,例如主要贊助商阿提哈德航空每年贊助費報稱係5,950萬英鎊,但實際只有800萬鎊由航空公司支付,其餘都係由文梳亞嘅阿布扎比聯合集團負擔。洩密文件顯示曼城用唔同方法喺開支同收入方面「造數」,最常用就係利用唔同公司以贊助費、肖像權費、獎金等形成「科水」畀球隊。
除咗「造假帳」夠晒離譜,「足球洩密」更爆出曼城「黑社會式」恐嚇歐洲足協,黑客偷到一封由曼城律師向歐洲足協發出嘅電郵,內容提到:「阿姆巴拉克(曼城主席)講過,佢願意用3,000萬鎊請晒世界最好嗰50個律師,喺未來10年告到你哋(歐洲足協)甩褲!」另外,6年前歐洲足協曾經有個7人調查團,審查曼城係咪違反財政公平條例,當其中1個成員不幸去世嗰陣,曼城個律師又寫過「1個玩完,仲有6個」嘅冷血字句。
歐洲足協2年前宣布展開調查嗰陣,曼城曾經提出抗議,認為歐洲足協唔應該利用「盜竊、不法手段獲取」嘅文件作為調查。據報洩密嘅黑客為葡萄牙人雷賓圖,佢依家正面臨147項刑事控罪,不過控罪內容都係關於葡萄牙球會以及其他機構,同曼城無關。