【藍月墮落】英超第5踢歐聯　曼聯偷笑

隨住曼城被禁止參加未來2季歐洲賽事，原本已經定咗七七八八嘅英超歐聯入場券，突然又出現極大變數。目前排第2位嘅曼城，雖然爭標幾乎絕望，不過坐穩前4位應該冇人會質疑，假設佢哋唔能夠推翻判決，英超第4個歐聯參賽名額將會順延畀聯賽第5位(如曼城入前4)，令歐聯爭逐變到「7國咁亂」。

根據歐洲足協條例4.08指出，當一間球會被禁參加歐洲賽，佢個位置會由所屬聯賽會下一支最佳成績球隊代替。李斯特城周六(15號)作客0比0悶和狼隊後，錫菲聯仍以39分佔據呢個「黃金第5位」，不過熱刺、狼隊、愛華頓同曼聯等名牌緊隨其後，而且各隊距離都喺4分或以內，就連第10位嘅阿仙奴都只係差錫菲聯8分兼少踢1場，下半季賽事競爭肯定相當激烈。

曼聯喺1月簽入波基斯費南迪斯同恩哈路兩大猛將幫手，衝擊歐聯席位決心相當明顯，如果佢哋最後真係拎第5位，踩住「鄰居」曼城嘅「屍體」踢歐聯，將會係英超最大諷刺。