史高斯睇死恩哈路：中超入波多又點？

曼聯周二(18號)凌晨大戰車路士，新兵恩哈路有機會首度披甲，不過呢位尼日利亞前鋒首演前就被名宿史高斯潑冷水，話睇死佢曼聯生涯唔會踢得幾多場，認真掃興。

1月轉會窗由上海申花借用加盟嘅恩哈路，日前被史高斯公開質疑：「我唔覺得佢係曼聯長遠計劃，佢喺中國嘅入球紀錄相當好，但係可信咩？我真係唔知！佢屬於曼聯依家缺少嘅柱躉式前鋒，多一個人用點都係好事，但以曼聯嘅級數，當然係要求多一個高質素嘅人，呢一點恩哈路仍有待證明，我唔覺得佢會有好多正選機會囉！」

恩哈路上季喺上海申花踢17場聯賽入10球，再之前2季踢長春亞泰亦踢55場入36球，平均每場入差唔多0.64球，如果嚟到英超都可以保持一半入球率，相信大部份曼聯球迷都會收貨。