夏蘭特入波創紀錄　但有人搶鏡過佢

數據最真實，刨波不二法門，彩報電子版周二、五更新：https://win.on.cc/epaper/archive.html　

周六(15日)凌晨德甲，多蒙特大炒法蘭克福4:0，19歲「挪威神童」艾寧夏蘭特射入1球，佢冬季加盟多蒙特以來，已累積入8球，成為德甲史上頭5場聯賽上陣入波最多嘅球員。

艾寧夏蘭特為多蒙特上陣5場聯賽，有4場取得入球，只有上場對利華古遜食白果，該場多蒙特亦輸波，換言之，只要艾寧夏蘭特入波，多蒙特就會贏波。

不過，今場波仲有1位球員表現比艾寧夏蘭特更搶眼，就係右閘阿舒拉夫，佢貢獻2次助攻。多蒙特打開紀錄1球，就係由阿舒拉夫回傳畀比薛斯基射入，艾寧夏蘭特有波入，亦係由阿舒拉夫助攻，呢位21歲皇馬借將，話唔定下季可以重返「銀河艦隊」擔正。

多蒙特另外2球分別由查頓辛祖、拉菲爾古里路射入，「蜜蜂兵團」歇冬之後5場聯賽轟入22球，火力非常驚人。