黃興桂：蔗渣阿特蘭大踢出燒鵝味道

全球最扣人心弦的球會級盃賽──歐洲聯賽冠軍盃，終於重開戰幔，喺本周中及下周中，將會進行8場嘅16強首回合，論牌面，今晚兩場確實戲碼較弱，但唔代表喺博彩方面冇好諗頭。

先講意甲奇兵阿特蘭大喺中立場聖西路球場對華倫西亞，前者今屆繼續以蔗渣價錢、打出燒鵝味道，不但喺意甲位居前列，首度征戰歐聯即能夠殺入淘汰賽階段，令人喜出望外。

相比之下，兩屆歐聯亞軍華倫西亞，今季演出明顯飄忽不定，既可擊敗巴塞及打和皇馬，但又會慘敗畀馬略卡之流，實在不宜高估。而且從足智彩賠率顯示，經驗遠遜華倫嘅阿特蘭大，竟要讓到半一，明顯備受睇好，看來呢路奇兵有力先拔頭籌。

至於熱刺主場對RB萊比錫，雖然熱刺近況略有起色，但射手哈利卡尼因傷倦影響甚大，除非主帥摩連奴仲有好多錦囊妙計未打開，否則出戰德甲「2哥」萊比錫難佔上風。

再睇埋足智彩賠率，熱刺主場出擊都只係小讓平半，明顯對呢支上屆亞軍信心不足，Peter認為萊比錫可全身而退，下盤固然可取，若進取啲直接揀更好分頭嘅和波。