球王福利！「細哨」豪踎VIP監獄

數據最真實，刨波不二法門，彩報電子版周二、五更新：https://win.on.cc/epaper/archive.html　

巴西傳奇球星朗拿甸奴最近因用假護照入境，喺巴拉圭被拘捕兼要還柙監獄，堂堂足球傳奇人物淪落到坐監當然慘情，連巴西總統都已經準備營救計劃。不過「細哨」今次入嘅原來係VIP監獄，難怪佢臨入冊前都係係笑晒口。

據外電報道，朗拿甸奴同佢阿哥阿斯斯所踎嘅監倉內，有床、電視機同埋風扇，其中電視同風扇並唔係監倉嘅標準配置，朗拿甸奴甚至唔使捱「監躉飯」，因為律師每日都會為佢哋送嚟飯菜。除此之外，「細哨」鐵窗生涯都好忙碌，事關唔少球迷專程去探監，前巴拉圭國家隊隊長加馬拉，日前更聯同幾位前國腳一齊去監獄探訪，有獄警表示：「朗拿甸奴心情唔錯，經常保持微笑。」

西班牙《每日體育報》消息指，巴西政界已經就呢件事向巴拉圭施壓，巴西總統博爾索納羅正準備「營救」行動，尤其博爾索納羅同「細哨」私交甚篤，「細哨」2年前就曾經為博爾索納羅拉票，上年「細哨」又被博爾索納羅任命為巴西旅遊大使，今勻當然唔會見死不救。