【有片】O嘴!朗拿甸奴入5球捧監獄盃冠軍

20200314
東網電視
更多新聞短片
數據最真實,刨波不二法門,彩報電子版周二、五更新:https://win.on.cc/epaper/archive.html 
足球場上無奇不有,巴西傳奇球星因為用假護照喺巴拉圭被捕,淪為監犯嘅新聞已經夠晒離奇,更加估唔到係「細哨」喺監獄入面竟然繼續有盃捧!早前報道過朗拿甸奴所入嘅監獄,每年3月份都會舉行一個「監獄盃」,由大約200位囚犯分成10隊角逐,朗拿甸奴今次「有幸」得到參賽資格,當然亦老實唔客氣。
據巴拉圭媒體《ABC》爆料,朗拿甸奴所帶領嘅球隊以超班姿態大熱捧盃,佢哋喺決賽更加狂勝11比2,「細哨」就獨取5球同交出6次助攻!決賽嘅片段亦畀人放咗上社交網,影片即時被球迷瘋傳,片中着住白色底衫同黑白花短褲嘅「細哨」,比賽入面如入無人之境,而且最後仲真係有個獎盃可以捧,報道話冠軍球隊仲會有隻16斤豬仔作為獎品。有網民更搞笑話,朗拿甸奴應該獲選今年嘅「金囚獎」!
由於上訴法院已經駁回「細哨」兩兄弟嘅上訴,法官認為佢哋潛逃風險好高,必須繼續羈押,朗拿甸奴可以疊埋心水喺監倉踢波減壓。