細哨保釋再被拒絕　美斯否認出手打救

涉及巴西詐騙案，又因為使用假護照喺巴拉圭踎監，「細哨」朗拿甸奴會唔變到一文不值？唔會！起碼法官認為佢值150萬歐元以上，因為有單假新聞話，美斯願出400萬歐元(約3,470萬港元)保釋佢两兄弟喎。

目前被拘留喺巴拉圭首都亞松森一所監獄嘅「細哨」，已經被囚禁成個禮拜，佢嘅律師團隊曾經要求用80萬歐元保釋被拒，近日再加碼到150萬(約1,300萬港元)，申請轉到市內一個小型住宅單位監視居住，法官依然Say No，理由係保釋金同佢嘅身家財產唔相稱喎。

法官咁判，唔知係咪受到最近有單假新聞影響，話阿根廷球王美斯願意出資400萬歐元「救人」，擔保呢個巴塞前輩，所以先覺得150萬太少呢？不過，美斯嗰邊已經透過西班牙《體育報》强烈否認，仲話雖然好同情「細哨」，但係一個仙都唔會畀。睇嚟朗拿甸奴仲有排要坐，可以考慮爭取蟬聯「監獄盃」5人賽冠軍嘞。