球星避疫!搶玩e-sports

20200322
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
新冠肺炎疫情全球肆虐,足球壇被無情打沉,不過其實仲有一班「運動員」仍在戰鬥,近年急速興起嘅e-sports喺虛擬世界中得到「免疫」,而且仲喺疫情下愈搞愈大,各大豪門都全力搶攻電競市場。由英乙球會奧連特發起嘅「《FIFA20》隔離盃」,竟獲16個地區共128間球會舉手參加,除職業電競選手參賽外,安祖斯唐辛、夏迪保亞等球星亦會出戰,夠晒睇頭!
雖然近年電競賽事嘅現場參與大大提升,部份大型賽事都因為疫情而暫停,但電競發展早期本身就唔需要觀眾,e-sports著名記者比斯勞表示:「人命比起運動或者電競世界都重要,不過今次疫情對電競工業係重要一役,傳統體育賽事停擺,所人有都留喺屋企工作同娛樂,呢兩樣都對電競嘅觀眾同參與非常關鍵。」
PSG率先「現實進軍虛擬」
據電子市場調查公司Newzoo報告,e-sports喺2019年嘅利潤達到9.05億美元(約70.2億港元),比2017年急增38%,預計2021年嘅利潤會去到15億美元(約116.3億港元),現實世界各大豪門都瞄準呢個市場,法甲班霸巴黎聖日耳門(PSG)就係足球壇「現實進軍虛擬」嘅先驅,佢哋早喺2016年已經成立官方電競隊,依家好多歐洲豪門都有成立自己嘅電競隊伍。
英乙球會奧連特上星期發起「《FIFA20》隔離盃」,反應空前熱烈,原本諗住搵64支球隊用《FIFA20》遊戲對戰,結果太多球隊報名參賽而增至128隊,包括曼城、阿積士、馬賽、阿特蘭大、薩爾斯堡等16個地區嘅球隊參加,博彩公司威廉希爾更為賽事開出冠軍賠率,矚目程度相當之高。
錫周三代表奪冠大熱
賽事上周三(18日)進行抽籤後,多支參賽隊都已公布出戰人選,曼城、阿積士、阿德萊德聯、華盛頓聯隊等多隊都會派出旗下電競隊成員,而且唔少都屬有世界排名嘅職業選手,代表標準列治出賽嘅ShadooW就係比利時全國冠軍,至於錫周三代表Mitch早前更喺國際電競賽事奪冠,難怪被威廉希爾列為6倍大熱。
部份球會就決定派現役球員出賽,較矚目嘅有水晶宮中場安祖斯唐辛、諾域治中場簡威爾、白禮頓嘅法國前鋒馬奧比、阿特蘭大後衞夏迪保亞等等,傳聞未公布人選嘅維拉可能會派人氣王基亞利殊出戰。奧連特宣布今日正式展開首圈賽事,隔日進行下一圈比賽,4月3號深夜就會誕生總冠軍,呢個賽事勢將e-sports熱潮推上高峰!