財政崩潰!英超球會要求延遲出糧

2020年03月26日 16:25
東網電視
更多新聞短片
(Getty Images)
數據最真實,刨波不二法門,彩報電子版周二、五更新:https://win.on.cc/epaper/archive.html 
新冠肺炎肆虐之下,英超停擺,各大球會「腳停口停」收入大減,陷入敗政危機。英國《每日郵報》爆料,指英超及其他級別聯賽球會都提出延遲出糧,甚至減薪、裁員。英超賽會將於4月3日開大會,商討延遲出糧嘅可能性。
英超最快都要5月先至有機會重開,球會自3月初賽事暫停後,門票收入變零,甚至需要「回水」,退回季票款項畀球迷。最大鑊係面臨失去7.5億鎊(約69億港元)電視轉播費收入,英超球會現時惟有勒緊褲頭,想延遲出糧畀球員。
據悉,英超賽會同球會將展開會談,以及同球員商討,希望延遲出一半人工,減輕球會財政負擔,等聯賽重開後,嗰一半人工會補發番,總之就有拖冇欠。事實上,球員薪酬一向係球會最大出支,例如曼城2017至18球季球員人工支出達2.6億鎊,利物浦更加達2.63億鎊,兩隊球員人工同樣佔收入超過一半。豪門財力比較雄厚,短期尚且頂得住,但紐卡素等中小型球會,就陷入水深火熱之中。
英超球星身家豐厚,延遲出糧可能對日常生活影響唔大,但有傳連球會職員都面臨延遲出糧,對呢班一般打工人,打擊就非常大。
英冠、英甲、英乙球會同樣出現財困,英冠榜首列斯聯計劃要求球員暫時減人工,班主拉迪沙尼表示,近5場主場賽事延期之下,已冇咗250萬鎊門票收入,令球會財政受到好大壓力。
伯明翰更加成為第一支要求延遲出糧嘅英冠球隊,周薪超過6000鎊嘅球員未來4個月都要減人工。英甲及英乙球會亦要求球員延遲出一半人工,可見今次新冠肺炎令英格蘭球會齊攬炒。