踢咩位都冇所謂!許宏鋒:教練信我就得

2020年03月26日 21:21
東網電視
更多新聞短片
許宏鋒●因飢餓開竅        (冠忠南區提供圖片)
「射手觸覺呀⋯⋯我只可以講我嘅進攻意欲仲喺度,仲好享受進攻樂趣,如果有機會,我都會衝上去試,始終自己之前都係踢前面。」今季為冠忠南區射入2個關鍵入球的許宏鋒說。「許前鋒」或許是許多球迷的心願,但現時的「宏鋒」則認為:「依家嘅我其實只要有狀態,打咩位置都唔成問題!」
圖/文:陳焌鏗
「宏鋒」在去年11月對陣香港飛馬和富力R&F時均取得入球,一球助球隊逼和對手,另一球則是一記「世界波」,讓球迷留下深刻印象。他透露狀態提升源於飢餓感強:「因為上季積落嘅傷患導致今季季初跟唔到球隊集訓,去年7、8、9月都冇練過波,去到9月尾先開始練番波,所以10、11月都係一個『餓波期』,每次落場都特別落力,加上自己休息咗咁耐,都覺得唔好意思,好想盡快貢獻球會,所以嗰兩個月自己狀態特別好!」
「宏鋒」補充:「嗰陣傷鼠蹊,跑又跑唔到,射波又用唔到力,連睇物理治療都話淨係可以唞,唞夠再做番啲力量訓練先可以斷尾,所以都幾困擾。」
射入兩個入球後,許多球迷期望「宏鋒」能重回前鋒位置,他卻認為:「踢左閘有左閘嘅作用,依家自己都算攻得守得,教練又信任我,畀我喺左路任攻,雖然有時教練會講,有需要嘅話會擺番我喺前面,喺前面入到波固然開心,但喺後面幫到防守又交到助攻嘅話,其實咩位置對我嚟講都OK。」
轉踢左閘、左翼衞已有4年多,「宏鋒」表示自己今季逐漸成熟,等到「收成期」,他感激列文和沈國輝這幾年間的教導:「列文上兩季練完波之後,會捉我同幾個後生仔加操,一對一咁教我哋,佢亦會同我講幾時上、幾時落,經過呢兩年之後,自己開始覺得有啲開竅,開始明白唔可以好似以前踢翼咁樣,係又衝唔係又衝。另外就係今年轉做助教嘅沈國輝,佢同我位置相同,會分享好多關於體力留放嘅嘢,會講解幾時應該上、幾時應該睇位,我同佢出外同房3年,傾咗好多呢啲嘢,佢哋兩個都幫咗我好多。」
【許宏鋒Profile】
出生日期:1994年2月4日
身高:1米78
體重:75公斤
位置:前鋒、左中場、左後衞
曾效力球會:橫濱FC(香港)、天行元朗、公民、標準流浪
現效力球會:冠忠南區
球衣號碼:12
26歲通天老倌 入選港隊隨緣
26歲,正值球員生涯的黃金年齡,雖然如此,但「宏鋒」未有想太多個人榮譽,只想好好為南區爭取好成績:「最大目標當然係幫球會攞冠軍,始終我哋年年都爭啲、爭啲咁,今季希望攞到錦標。其次係香港隊,不過外界對我嘅定位都唔係咁清晰,究竟許宏鋒係進攻球員定係防守球員呢,所以香港隊如果淨係要一個正宗左閘,我都唔知佢會唔會揀我,前鋒又有大把人選,所以隨緣啦。」
至於外流方面,曾在美國試腳的他謂:「如果有機會都會試,但首先要喺本地聯賽踢番好先,自己依家先成熟,想喺本地賽打響名堂先,畀人哋睇到許宏鋒攻得守得,係一個主力!」