夏蘭特拒絕曼聯真相曝光！蘇B累事

數據最真實，刨波不二法門，彩報電子版周二、五更新：https://win.on.cc/epaper/archive.html　

曼聯1月幾乎可以簽入挪威神鋒艾寧夏蘭特，但卻被多蒙特以2000萬歐元轉會費低價截胡，當時有消息指係艾寧夏蘭特唔想成「魔」，至於具體原因係乜，佢爸爸夏蘭特依家終於公開呢個秘密。

「老夏蘭特」話：「加盟一支球隊，必須對方全隊上下都想你加盟，而唔係只有主帥想你加盟。同埋要睇下呢間球會過去5至10年發展情況，如果只因為領隊因素而轉會，

係非常危險，主帥隨時可能被炒。」

「老夏蘭特」明顯係指曼聯近年經常換帥，即使領隊蘇斯克查係艾寧夏蘭特效力莫迪時期嘅恩師，但執教曼聯後，帥位並唔穩，今季已多次傳出可能被炒，如果艾寧夏蘭特真係去跟蘇斯克查搵食，一旦蘇B下台，艾寧夏蘭特可能被新帥棄用，影響前途。

艾寧夏蘭特加盟多蒙特後，表現更上一層樓，獲得皇馬等豪門垂青，證明佢當時選擇轉投多蒙特係正確決定。