曼聯肯減價賣史摩寧　但有一個條件

足球博彩神器，每日重心提供盡在《彩報》：http://win.on.cc/football/　

基斯史摩寧今季被曼聯外借去意甲羅馬之後，表現出色，唔止羅馬想買斷佢，連阿仙奴都加入爭奪。曼聯一度索價3200萬鎊轉會費，令兩大買家卻步，但依家情況有變，意大利傳媒指，如果曼聯成功簽入拿玻里中堅高列巴尼，就會減價出售史摩寧。

30歲嘅基斯史摩寧被稱讚為今季意甲表現最出色中堅，防守穩陣之餘，仲不時上前助攻，已取得2個聯賽入球，仲多過被曼聯外借去國際米蘭嘅前鋒阿歷斯山齊士。

因此，羅馬一直好想買斷基斯史摩寧，但問題係羅馬財力有限，最多只能出1500萬鎊，遠低於曼聯要求。

不過，由於拿玻里中堅高列巴尼打算今夏離隊，曼聯一直對呢位28歲塞內加爾國腳好有興趣，所以只要簽到佢，就可以放走基斯史摩寧。

據悉，拿玻里將高列巴尼定價為9000萬鎊，比曼聯陣中最高身價後衞哈利馬古尼仲多1000萬鎊，成為交易最大障礙。