最傷感抗疫故事　西甲天字第1號加雷

數據最真實，刨波不二法門，彩報電子版周二、五更新：https://win.on.cc/epaper/archive.html　

新冠肺炎疫情肆虐下，成個地球人人自危，效力華倫西亞嘅阿根廷球星加雷，就不幸成為西甲第1個確診球員。33歲嘅加雷踏入2020年後流年不利，先係2月份重傷提早收咧，之後又成為西甲嘅「天字第1號」，被逼要喺父親節前將一對仔女暫時送走，就算同住一屋嘅老婆亦唔能夠接觸。

加雷喺3月15號確診後，第一時間將一對仔女送去畀爺爺嫲嫲照顧，老婆Tamara雖然繼續留喺大屋之內，但加雷就全程匿喺自己房入面隔離，即使共處一室，亦要用視像電話溝通，Tamara最近喺IG公開一張兩人隔住玻璃「錫錫」嘅相片，直頭好似係催淚電影嘅橋段。

3月19號係西班牙嘅父親節，病情好轉嘅加雷收到一對仔女畫嘅「父親節卡」，Tamara亦整咗個蛋糕嚟同佢慶祝，加雷都忍唔住喺社交網向老婆表示感激：「無論發生咩事，你都一定喺我身邊，我真係好愛你，多謝！」