利物浦警號?英足總宣布5級聯賽今季作廢

2020年03月27日 17:00
東網電視
更多新聞短片
數據最真實,刨波不二法門,彩報電子版周二、五更新:https://win.on.cc/epaper/archive.html 
英國新冠肺炎疫情嚴重,由英超至英乙嘅聯賽都全面暫停,可唔可以踢得番仲係未知之數,今季成績點樣計亦引起極大爭議。英格蘭足總周五(27日)宣布,屬於業餘組別嘅全國聯賽(National League)第3至第7級賽事,球季將會即時終結,而且今季成績會全部作廢,意味冇任何冠軍同升、降班球隊。
英格蘭足總聲明表示:「英格蘭足球面臨嚴峻挑戰,所有決定都係想保障賽事嘅利益,我哋最關注嘅係所有球會、球員、職員等嘅健康。」全國聯賽係英超、英冠、英甲同英乙之下嘅第5級聯賽,而業餘嘅全國聯賽本身亦有7個級別,今次英足總嘅指令就包括第3級至第7級賽事,合共有91個地區聯賽受到影響。
今季成績取消當然會引起好多利益衝突,好似原本屬於第6級聯賽球隊澤西公牛(Jersey Bulls),今季踢27場錄得全勝,領先緊20分下已經確定升班資格,但係英足總嘅「取消令」就累佢嘅「白贏」。另一支第6級聯賽球隊南希爾茲(South Shields FC)喺停擺前亦以13分領前,升班在望,點知突然被告知成績取消,球會主席卓夫湯臣已經表明考慮打官司:「球會已經去信足總表達強烈抗議,唔排除會採取法律行動,無論上訴結果係點球會都會繼續經營,但無可否認呢個決定對球隊財政打擊極大。」
更多球迷關注嘅係,英格蘭足總今次「一刀切」式取消91個聯賽今季成績,將來會唔會用同一方式應用喺更高級聯賽,包括全球關注嘅英超身上,如果澤西公牛連已經確定到手嘅升班資格都可以取消,咁仍未鎖定英超冠軍嘅利物浦,會唔會成為另一隊澤西公牛呢?