梁梓翺投群馬草津溫泉青年軍 為闖日職鋪路

2020年03月27日 19:55
東網電視
更多新聞短片
闖日追夢!足球+升學 神同步
去年底歐陽耀冲及彭林林,飛赴日本千葉參與「試腳」,消息備受球迷和傳媒關注。不過,早在「歐冲」和「林林」赴日前的3個多月,已有香港球員成功搶灘,獲當地球會收歸旗下。現年18歲的前港青後衞梁梓翺(Owen),去年9月透過Mirai Soccer 的「Project J」,赴日參與群馬草津溫泉青訓學院一星期的「試腳」訓練,最終憑優異表現獲青睞,如願加盟群馬草津溫泉青年軍,為投身日職踏出重要一步。
文:戴陶蔚 圖:MiraiSoccer提供
在香港不少家長都認為「足球」和「升學」不可共存,當兒子去到某個年紀,必要為他或迫他在兩者之間,作出決絕的選擇,然而,Owen和其父母就毋須面對這個情況。一直獲父母全力追尋足球夢想的Owen,早於2015年就曾獨闖葡萄牙學法兩年,先後效力過艾斯杜尼U15,以及比蘭倫斯的U16青年軍。到去年9月,Owen透過「Project J」先通過在港的技術測試,從而取得赴日參加群馬草津溫泉青年軍,為期一星期的「試腳」訓練,最終獲取錄成為球隊一員。「好高興可以得到日本嗰面教練嘅垂青,我好清楚今次嘅機會唔係咁易得到,我會畀心機去練波,同完成個高中課程。」司職右後衞的Owen謂。
能夠加入群馬草津溫泉青年軍,「畀心機去練波」可以理解,但與「完成個高中課程」又有何關係呢?據Owen表示,「Project J」 在他「試腳」成功後,隨即安排其入讀當地的語文學校學習日語,為報考利根商業高校的入學試作準備。「Owen試腳得咗之後,就一直留喺嗰邊嘅寄宿家庭生活,每星期一至五早上學日文,期間3至4晚會參與球隊嘅訓練。到今年1月佢Pass埋個入學試,喺新一個學年開始,佢就係利根嘅高校生喇。可能Owen自己喺葡萄牙生活過,佢喺日本都適應得好快,寄宿家庭嘅高橋夫婦都讚佢比好多同年紀嘅年青人自立。」Mirai Soccer創辦人潘志鏗(Valen)表示。惟Owen補充謂在鄉郊地區的水上町生活有點苦悶,上網速度也很慢。「唔係投訴,反映啫!哈!哈!」
根據「Project J」的計劃,Owen在未來3年間,「足球」方面會先以由青年軍突圍,獲提升到預備隊參與地區聯賽為首要目標;「升學」方面則最少完成高中課程。「3年之後,Mirai Soccer會擔當Owen經理人嘅角色,透過同J2、J3球會嘅網絡,安排佢喺日本落班。當然,佢能夠喺未讀完高中,已經有球會簽佢,或者佢想邊踢波邊讀大學,我哋都會支援佢啦!」Valen說。
因疫情之關係,原定本月會短暫回港辦理學生簽證手續的Owen未能成行,在新學期開始前(原定4月),都會過住早上學日文,晚上練波的生活。雖然要與父母分隔異地,兼且過着刻苦的規律生活,但這位年青人不僅未有怨言,反而懂得感恩,他說:「我知道爸爸媽咪為咗畀我參與Project J,付出咗好多,每個月又要畀我生活費。好多謝佢哋咁支持我,呢3年我會好畀心機,逐步逐步挑戰更高層次,成為第一個喺日本職業聯賽落班嘅香港球員,同埋可以為香港隊上陣。」在Mirai Soccer的穿針引線下,Owen己獲得Kelme HK及Kelme Japan的個人贊助,稍後更會為Kelme Japan的產品季刊擔任模特兒。
【梁梓翺Owen檔案】
出生日期:2002年1月11日
司職:後衞
曾效力球會(只列部分)
灣仔U11、東方U13及U16、太陽國際U14及U18、艾斯杜尼U15、比蘭倫斯U16
現效力球會:群馬草津溫泉青年軍
MiraiSoccer致力發掘港澳台新秀
群馬FC青訓學院近年致力由台灣、香港和澳門,吸納15至18歲具潛質的年青球員,藉此增強本身青年軍實力,並以為日職提供新血為長期目標。Mirai Soccer作為群馬FC青訓學院香港及澳門地區代理人,在得到沼田巿巿長橫山公一的支持下,與群馬FC青訓學院「揸弗人」津久井功(下圖)合作的「Project J」,在每年6至9月期間,透過選拔和技術測試,揀選具潛質的港、澳年青球員赴日參與為期一星期的「試腳」訓練,情況就像Owen一樣。
「參與計劃嘅年青人,我哋每個星期都會親自向佢哋嘅父母做簡報,包括佢哋囝囝喺日本嗰邊訓練、讀書同生活嘅大小事。我哋亦鼓勵球員表達自己嘅意見,務求整個計劃可以順利進行。今年我哋希望『Project J』可以有最少4個年青球員可以加入,到2023年可以有第一位球員喺日職亮相。」Valen堅定地道。