蘇蘭奴涉違反禁令　電視台直播拘捕行動！

足球博彩神器，每日重心提供盡在《彩報》：http://win.on.cc/football/　

正當全世界都被呼籲留喺屋企抗疫，仍然有唔少球員「偷走」嘅新聞出現，最新一單就牽涉前紐卡素球星、秘魯名將蘇蘭奴，佢日前因為涉嫌違反聚會禁令走去開Party，結果被警察圍捕，而且更有電視台全程直播，相當有戲劇性！

據電視台直播畫面所見，秘魯警方接報到達「案發現場」後，因為喺門口按鐘冇人回應，一度想爬牆入屋進行拘捕，最後依家擔任秘魯國家隊助教嘅蘇蘭奴，抱埋囝囝出嚟跟警察返警局，電視台全程直播晒成個拘捕過程。

蘇蘭奴事後否認有違反禁令，更指電視台係專登設局畀佢踩：「我唔係開P，只係同埋家人一齊去鄰居屋企食飯，鄰居同我屋企只係相距50碼，而且餐飯只係得6、7個人，可能有人聽到有音樂傳出，懶聰明咁去通知電視台，鬼叫我係公眾人物，結果就發生呢件事。」蘇蘭奴表示去警局落口供係一貫程序，強調自己並冇被捕。