愈傳愈離譜　美斯罕有連環澄清假料

足球博彩神器，每日重心提供盡在《彩報》：http://win.on.cc/football/　

近日有關巴塞球王美斯離隊新聞，傳到周圍都係，講到佢去硬國米咁款，以往對傳聞甚少理會嘅美斯，周五(10日)凌晨罕有貼文澄清，仲1次過否認3則傳聞，叫大家唔好再亂講。

自從巴塞爆出內亂後，美斯離隊消息幾乎未停過，球隊戰績同美斯場上演出亦難免受影響，不過近期西甲因疫情暫停，大家都可以抖抖，但美斯改投國米嘅傳聞仍然被熱炒，球王趁得閒，就喺社交網澄清，仲交代埋之前幾單假料。

首先，美斯澄清佢即將轉投國米，係假新聞，仲打咗個#FAKENEWS字樣落條消息度；之後，佢再澄清，之前傳佢向巴拉圭監獄中嘅朗拿甸奴送錢，呢單同樣係假料。

最後，美斯喺文尾補充，早前話佢會重返紐維爾舊生嘅消息，都係假料，仲話幸好呢單料根本無人相信。