薛羅拔圖恐怖爆肌　媲美《功夫》阿伯

巴西球星薛羅拔圖大家仲記唔記得？呢位踢過皇家馬德里、拜仁慕尼黑等豪門嘅巴西國腳，2年前先至喺彭美拉斯宣布掛靴，足足有23年嘅頂級聯賽生涯。現年45歲嘅薛羅拔圖，最近喺社交網公開近照，之前身型瘦削嘅佢，居然練得一身超強肌肉，白鬍鬚加上「爆肌」造型雖然唔多Match，但就引嚟超過100萬Like，認真犀利！

薛羅拔圖在家抗疫期間，貼咗多段練習影片，可見佢退休之後仍未放棄鍛鍊身體，佢早前就曾自爆「操弗」秘訣：「我冇任何壞習慣，唔飲酒又唔食煙，而且食得好又瞓得好。」薛羅拔圖職業生涯奪獎無數，喺皇馬贏過歐聯同西甲、為拜仁慕尼黑4奪德甲冠軍，又幫巴西拎過2屆美洲國家盃冠軍，唔少球迷都話佢依家雖然45歲，但身體仲弗過好多職業球員。

足球博彩神器，每日重心提供盡在《彩報》：http://win.on.cc/football/