曼城防線大改造！搶購最強00後中堅

曼城今季英超積分被利物浦遠遠拋離，已經衞冕無望，好大程度上因為鬧中堅荒，經常要防中費蘭甸奴客串踢中堅，搞到防線穿窿，領隊哥迪奧拿急需喺今夏簽入新中堅堵塞漏洞，依家收購目標直指史浩克04嘅20歲天才奧辛卡巴克。

出生於2000年嘅奧辛卡巴克身高1米86，出身於土耳其勁旅加拉塔沙雷，亦係土耳其國腳。佢2019年1月登陸德甲加盟史特加，踢咗半季聯賽上陣15場，入咗3球，對1位年輕後衞而言，實在難能可貴，並當選上季德甲最佳新人。

史浩克04上年夏天立即用1500萬歐元收購奧辛卡巴克，佢繼續有出色表現，唔止防守穩健，仲有餘力助攻，喺德甲又有3球進帳。

早前《轉會市場》列出10位最值錢2000年後出世嘅球員，奧辛卡巴克以2900萬歐元，排第10位，亦係唯一上榜嘅後衞，可見佢極具潛力成為頂級中堅。

哥迪奧拿睇好奧辛卡巴克可以成為下一位高柏尼，曼城要出2900萬歐元收購佢，並唔困難。