大諗頭！簡拿華路豪言要教皇馬

意大利名宿簡拿華路多年來都喺中國搵食，現時擔任中超球會廣州恒大教練，但原來佢好有大志，聲稱自己目標係執教皇馬等歐洲豪門。

簡拿華路話：「如果要成為一位出色教練，必須考慮執教頂級球隊，例如皇馬、意大利國家隊，或者其他歐洲勁旅，我現時非常努力，就係為咗執教皇馬呢種球隊。」

46歲嘅簡拿華路球員時代曾於2006至09年效力皇馬，佢似乎想學施丹，踢過「銀河艦隊」之後，再以教練身份回歸。

不過，簡拿華路教波履歷並唔起眼，2014年開始教練生涯以來，大部分時間都喺中國度過，包括執教廣州恒大、天津權健(現稱天津天海)，短暫兼任中國國家隊主帥，另外教過沙特阿拉伯球會艾納斯1季。

換言之，「大簡」仲未有教歐洲球會嘅經驗，如果佢真係想成為皇馬教練，恐怕應該先返歐洲教番幾年波，做出成績先至得。