【有片】法明奴守龍！勁過阿祖安

英超停擺期間，球員們不忘自己操練，利物浦前鋒羅拔圖法明奴亦好落力練波，甚至仲練埋守龍門，而且表現非常出色。

從佢上載到社交網嘅兩分半鐘片段見到，呢位巴西國腳被射咗幾十腳都冇失守，獲得球迷一致好評，指法明奴守龍技術仲好過利物浦2號門將阿祖安卡斯迪路。

羅拔圖法明奴同1位家人喺後花園練習射波同守龍，法明奴先負責守龍，見到佢左飛右撲，無論高波同地波射門，都過唔到佢十指關，甚至可以單手救波，架功十足，結果佢位家人係咁輸，要接受做掌上壓大懲罰。

利物浦球迷睇完片之後都好驚喜，大讚法明奴係1位出色門將，起碼好過球隊2號門將阿祖安卡斯迪路，以及被外借出去嘅「膠龍」卡利奧斯，甚至講笑話，法明奴有能力同艾利臣比加爭奪正選門將之位。

如果艾利臣比加將來喺比賽之中，唔好彩受傷或者被逐，領隊高普真係可以考慮一下畀羅拔圖法明奴客串守龍頂住先。