【同球星倾吓偈】Haters正反两面睇

虽然疫情令到本地篮球坛停摆，但我哋嘅facebook专页《睇体》就设立新栏目“同球星倾吓偈”，旨在畀一班甲一球星安坐家中，都能够同球迷互动Chat吓！主持人“司徒大导”喺新开张第一击，搵嚟最有Noise嘅南华后卫罗意庭，亲身解答球迷留言问题，畀机会大家更深入了解呢位集“欢呼与柴台”于一身嘅话题人物！

●司徒大导：喺甲一篮球赛场上，你嘅掌声多，但柴台声亦多。需知道掌声容易接受，但你会以乜嘢心态去面对柴台声？

罗意庭：呢条问题问得好好，要完全回答嘅话应该足够做一个专访。我就针对用一个乜嘢心态去面对柴台声去讲。呢类问题我系其他访问都答过唔少次，老实讲，每个阶段都有唔同感受，直到现在回望过去，我会认为系对我篮球场上成就嘅一个肯定。点解咁讲呢？因为球员要令到观众为你欢呼同时又嘘你，系唔容易嘅一件事，甚至我有时认为要令到佢哋嘘你比起为你欢呼更加难。

其实我都会谂点解会嘘？可能有好多唔同原因，例如我喺球场上真系表现唔好，可能系凑热闹人嘘佢又嘘，最大可能或者系唔想见到我为效力嘅球队带来胜利，想我同球队都将冠军让出去，大概都系想影响你表现嘅做法。站在对方立场，佢哋只不过系为喜爱球队打气嘅一种方式，呢点我系明白。唯一我唔能够接受嘅，就系对方以人身攻击同粗言秽语问候我，包括家人同朋友。

●司徒大导：点睇球场上嘅嘘声？

罗意庭：我都有缺点，我都唔系是一个完美嘅人，希望大家可以接受同包容我嘅不完美。依家我都用比较正面嘅思想去面对类似情况，能够令观众为自己欢呼又嘘嘅球员全世界有几多个？我认识而最有说服力嘅就只有两位——Kobe Bryant同LeBron James。当然我嘅实力无法跟两位相比，但外国媒体都称这群人为Haters。连两位伟大球员都有Haters嘅时候，我面对嘅又算系乜嘢。

之所以我讲有Haters系一种肯定同成就，系因为喺整个NBA联盟并唔系每位球星都有Haters。我认为Haters有时会令自己发现不足，从而去追求更好嘅自己。我大概系用呢个正面态度去看待呢件事情，喺呢度我要多谢一直支持南华篮球队同我嘅球迷、朋友！亦都多谢Haters令我变得更好！

●Wing Ka Hon：10多年前嘅训练器材同配套都不及现今先进，但你都已经可以入樽，系你天生跳得劲，抑或有独门方法去练弹跳力？可以分享一吓吗？

罗意庭：我觉得自己有大部分都算系天生，当然后天嘅训练都帮助好多。我个人比较喜欢冲斜路同深蹲。

●Anton Fung：你结婚一段日子，有冇谂过生小朋友？如果小朋友有运动细胞，你最想佢玩乜嘢运动？

罗意庭：当然有计划生小朋友，玩任何运动都冇所谓，最紧要佢自己钟意。

●William Sin：点睇本地篮球培训喺呢10年入面嘅变化，正面系啲乜，负面又系啲乜嘢呢？

罗意庭：由于近几年嘅网络发达，我哋好容易透过呢啲信息学习，加上外国教练同外援嘅引入，我哋喺篮球方面嘅知识比起好几年前的确进步咗好多。但事实香港篮球整体水平，我都几肯定系同国际水平脱轨，我哋缺乏贴近国际篮球水平嘅训练方式，更谈唔上有长时间专业训练。南华同东方喺呢方面会做得比较好，其他甲一头4后嘅球队会比较缺乏呢方面资源。

虽然我哋从网络接收信息，我哋又真正接收到几多成？当中窍门我哋又系唔系真系学到？如果咁容易就拉近同国际水平，我哋成日睇NBA，岂不是我哋都系NBA水平？要提高整体篮球水平，我个人认为要长时间接受贴近国际水平训练方式，呢方面，聘请外国教练系其中一个方法。

●Tia Tia Tia：想问喺本地及外国篮球坛，最欣赏边位球员同教练？

罗意庭：本地球员好多位我都欣赏，特别会系自己球队入面，因为接触比较多同比较熟悉，例如现役有Duncan、梁兆华、Nathan（余理洋）、朱亮、黄律尧等等，基本上成个南华入面嘅队友我都好欣赏，因为大家一齐做队友咁耐，见佢哋仲多过屋企人，队友嘅努力每次练习都感受得到。其他球员会有方诚义、蔡再勤、陈兆荣、李琪。本地教练我欣赏现任南华主教练Mensur、朱耀明教练、翁金骅教练。外地教练就系台湾啤酒篮球队主教练周俊三、广东宏远主教练杜锋。外国教练有2012球季执教我当时効力CBA福建队嘅主教练Coach Joey。外国球员当然唔少得NBA球星LeBron James、Kobe Bryant、Kevin Durant。

●Gary Poon：你觉得香港本地历史最佳控卫系边个？

罗意庭：以我认识又交过手嘅本地控卫，我认为系张锦州、潘志豪、香振强。当然仲有我自己！

●Chim Chan：咁多年你都系着5号波衫，有冇特别意思o架？

罗意庭：因为我同老婆相识当日系5号，所以选择球衣号码5。

●Rio Tam：阿庭想问你，喺你咁多年嘅篮球运动员生涯，有冇边场本地比赛系你最印象深刻呢？边一场CBA比赛令你最深刻？可唔可以畀啲意见想去闯荡一啲更高水平联赛嘅本地球员呢？

罗意庭：早期“红黄大战”嘅一系列比赛都好深刻，当时比赛气氛非常激烈，但又很享受！CBA当时都有好几场，最深刻系2012赛季全国直播我效力嘅福建浔兴主场迎战卫冕嘅广东宏远，最后我哋获得胜利。本地球员要时刻装备自己，因为你唔知道机会几时突然出现。