阿古路自爆：或者明年重返西甲

曼城射手阿古路將於明年6月約滿，由於佢唔打算再續約，前途備受關注。呢位即將32歲嘅阿根廷國腳自爆唔排除重返西甲搵食，如果成事，屆時將可以同國家隊友美斯碰頭。

阿古路接受西班牙傳媒訪問時話：「我知距離約滿日子已經愈來愈近，可能到時會獲得部份球隊邀請加盟，但依家好多事情仲未肯定，當然我唔排除重返西班牙，亦可能去其他國家，暫時只希望為曼城爭奪歐聯冠軍。」

阿古路2006年由獨立隊轉投馬體會，其後代替費蘭度托利斯，成為球隊主力射手，佢效力馬體會5季，射入74個西甲入球。

阿古路喺馬體會打出名堂之後，2011年加盟曼城，現時以254球成為曼城史上入波最多嘅球員，佢對馬體會仍有一份特別感情。

值得一提，前車路士射手迪亞高哥斯達離開英超，都係重返馬體會，阿古路將來行佢條舊路都唔出奇。