死不悔改！基爾獲加無視禁令演「帽子戲法」

韓職周五開火，最強資料庫、第一手資訊盡在《彩報》：

http://win.on.cc/football/　

新冠肺炎疫情喺英國相當嚴重，政府已經頒下禁令，要求盡量留喺屋企，但曼城基爾獲加總係要拗頸，被發現24小時內3次違反隔離令走出街，即使被罰款對佢嚟講都係濕濕碎。

英國《太陽報》直指呢係曼城後衞「死性不改」，佢被發現今個星期三下午離開自己嘅豪宅，再駕車到43公里外嘅妹妹屋企，約埋朋友幫家姐慶祝生日，夜晚又到8公里外嘅父母屋企；到禮拜四下午就同朋友一齊出外踩單車。當然呢啲全程都無戴口罩，肆無忌憚隨街走。《太陽報》話佢24小時內連續違規外出三次，就如上演另類嘅帽子戲法。

喺疫情期間，今次已經唔係基爾獲加第一次被發現違規，佢上個月已被爆開性愛派對，道歉過後又被發現喺屋企睇網上脫衣舞騷，麻煩事一單接一單。上次佢已經被警方警告，今次再違規，警方可能對佢發告票要罰錢。

有消息人士就話佢簡直係白痴：「都唔知佢要被警告幾多次先知守規炬？希望警察快啲拉佢。」