巴西神鋒2射1傳!蔚山現代夠霸氣

20200509
東網電視
更多新聞短片
韓職開戰,最強資料庫、第一手資訊盡在《彩報》:
韓職於周六(9日)上演3場大戰,頭場蔚山現代主場對尚州尚武,上季亞軍蔚山現代擁有去過英超搵食多年嘅李青龍助陣,實力明顯勝一籌,33歲巴西前鋒祖利亞尼加奧表現大勇,個人梅開二度,兼貢獻1次助攻,協助蔚山現代以4比0大勝尚州尚武。
雖然係首輪聯賽,但雙方狀態唔錯,快上快落鬥攻,開波8分鐘就出現入球,蔚山現代把握力比較強,前鋒祖利亞尼加奧接應隊友妙傳,於右路窄角度射入。
尚州尚武屬於南韓軍方機構,球員全部都係為國服兵役,體力雄渾,都好積極壓前進攻,但組織力欠佳,往往去到對手禁區頂就斷纜,而且仲令到對手有唔少打反擊嘅機會。
蔚山現代佔上風,創造唔少攻門,尹比加林、金仁成先後遠射唔中目標,積遜大衞臣左路傳中,祖利亞尼加奧心口控定起腳,可惜省中對手唔入。
蔚山現代掛住攻,門將趙賢祐幾乎派膠,佢解圍不遠,被對手截到波,順勢起腳,好彩佢自己接到。
蔚山現代避過一劫,果然有運行,44分鐘金仁成殺入禁區被對手拉跌,球證直吹12碼,祖利亞尼加奧主射入網,個人梅開二度。
下半場開波5分鐘,蔚山現代又入波,祖利亞尼加奧突破越位,傳畀李尙憲輕鬆近門射入,表現活躍嘅蔚山現代10號仔尹比加林為球隊埋齋。
蔚山現代上季煞科戰輸波,搞到失冠,今季首戰即大勝,盡顯爭冠決心。