專欄輪住嚟 杜馬思:非常感激「立立」!

2020年05月09日 20:00
東網電視
更多新聞短片
杜馬思十分感激李輝立的照顧。
由於標準流浪唔會踢8月中重開嘅港超聯賽事,總監「立立」一早已經安排好,出晒糧畀啲外援,走到嘅好似史提芬彭利拿咁,已經返咗祖家巴西同家人天倫樂,未走到嘅好似巴辛咁就繼續留喺香港,等阿根廷嘅機場重開先走。
原本以為會一直留喺香港嘅杜馬思,早兩日打畀我約飲下午茶,一坐低佢就話佢都會返巴西喇,呢個月28號就上機。我提佢記得買啲口罩返去,佢就話已經掃咗兩次貨,應該夠晒佢喺巴西嘅屋企人,包括佢媽咪同個女用。
嚟緊8月就夠期可以申請特區護照嘅佢,傾開今季跟番「立立」,佢就話好感激呢位7年前,曾經嫌佢細粒,差啲想彈佢鐘嘅標準流浪總監,佢咁講:「如果唔係Philip收留我,今季都未必搵到班落,佢仲畀個隊長我做,真係好多謝佢。」
之前喺巴西返嚟送咗個瑪黛茶杯畀我嘅杜馬思,就話下次再返嚟嘅話,會帶其他特產畀我,問我想要乜,我話想識巴西妹,佢就話介紹佢阿媽我識。OK,我哋唔再係朋友喇!哈!哈!
大頭