英超出大絕！反對復賽就降班

韓職開戰，最強資料庫、第一手資訊盡在《彩報》：

http://win.on.cc/football/　

英超賽會正積極準備重開賽事，但英國傳媒早前指般尼茅夫、阿士東維拉、諾域治都反對復賽，因為呢3隊位處降班區，想藉取消今季賽事，保住英超席位。

不過，英國《鏡報》最新消息指英超賽會態度非常強硬，警告呢3支護級份子如果阻礙下月喺中立場復賽嘅計劃，就以目前成績作結，意味呢3隊會直接降班。

般尼茅夫、阿士東維拉、諾域治分別以27分、25分、21分，排聯賽榜最低3位，佢哋擔心如果根據早前計劃，賽事喺中立場舉行，球隊失去主場之利，搶分希望就會大受打擊，削弱護級機會，所以寧願「攬炒」抵制復賽計劃，並呼籲取消今季升降班。

不過，英超賽會為避免出現巨額轉播費損失，對於復賽勢在必行，並計劃安排喺中立場踢晒餘下賽事，既可以保持轉播收入，亦可以減低球員感染新冠肺炎機會，絕對唔容許「3小強」抵制行動。

英足總亦表明支持重開英超，並維持升降班，據悉英超將於周一(11日)開會再傾重開問題，如果傾唔掂數，或者需要用投票決定今季命運。