英超老闆憤怒了：唔復操就唔好出糧

集多媒體分析、最強資料庫及第一手資訊於一身，即上《彩報》：

https://win.on.cc/football/video.html　

根據英超賽會同球會早前達成嘅協議，20支球隊原定周一(18日)全面復操，但傳出多位球員擔心會感染新冠肺炎，影響家人健康，唔想復操，引起球會不滿，有管理層發出警告，如果球員唔復操，就唔好出糧。

英國《天空體育》訪問多間球會管理層，關於球員拒絕復操嘅問題，有高層作出嚴厲斥責：「我唔確定合約點寫，但認為佢哋唔應該獲得薪酬，你可以出街問人，如果畀你6萬鎊周薪，你願唔願意練波同踢波，我相信係人都會願意，因為呢班球員每星期接受2次檢測，同佢哋比賽已經非常安全，所以球員嘅態度令我非常憤怒。」

另有1間英超球會老闆表示，將於周一(18日)稍後時間舉行會議，各間球會可能會投票，一致通過重啟第1階段操練，佢預計大部份球員會歸隊，進行分組訓練，但超過一半球員對於第2階段團隊操練及復賽，都感到疑慮。