鹹魚翻生！梅拿變歐洲5大聯賽助攻王

集多媒體分析、最強資料庫及第一手資訊於一身，即上《彩報》：

https://win.on.cc/football/video.html　

拜仁慕尼黑喺德甲大炒法蘭克福5:2，表現最令人驚喜球員一定係湯馬士梅拿，呢位近年水準走下坡嘅中場射入1球及1次助攻，佢今季聯賽已累積17次助攻，超越曼城中場奇雲迪布尼，升上歐洲5大聯賽助攻榜榜首。

30歲嘅湯馬士梅拿近年狀態一度陷入低谷，更加被德國國家隊主帥勒夫放棄，甚至有傳拜仁慕尼黑都有意賣走佢。

無可否認，湯馬士梅拿整體演出已無復當年之勇，特別係入波數字大幅下降，過去3季德甲都只入到單位數，今季亦僅有7球進帳。

不過，漢斯弗利克接手執教拜仁之後，搵到「梅拿說明書」，令呢位已效力球隊12年嘅忠臣鹹魚翻生。湯馬士梅拿依家擔當新角色，專注為隊友鋪橋搭路，創造入波機會，效果非常好，證明自己仍然係拜仁不可缺少一員。