同美斯睇齊！辛祖創下多蒙特111年紀錄
20200524
東網電視
更多新聞短片
(Getty Images)
集多媒體分析、最強資料庫及第一手資訊於一身，即上《彩報》：
周六(23日)晚德甲多蒙特「雙閘齊飛」，憑兩閘拉菲爾古里路及阿舒拉夫各省1粒，作客以2:0輕取禾夫斯堡，不過焦點落喺查頓辛祖身上。
備受各大豪門垂青嘅查頓辛祖，聯賽重開後連續兩仗都冇份擔正，令人意外，但佢後備入替冇揸流攤，更妙傳阿舒拉夫攻入第2粒。
呢球係查頓辛祖今季聯賽第16個助攻，創下多蒙特111年隊史嘅新紀錄，成為單季聯賽最多助攻嘅「蜜蜂仔」。連同14個士哥，辛祖喺今季聯賽已製造30個入波，冠絕德甲之餘，亦拍住巴塞球王美斯、拜仁射手羅拔利雲度夫斯基及拉素前鋒恩莫比尼，成為今季歐洲5大聯賽中僅有4位製造30粒嘅球員。
與此同時，呢位英格蘭快翼入波同助攻均達雙位數，今季只有美斯能做到，弗到漏油，嚟緊周中快車火併拜仁，好大機會重獲正選。