蔚山和波首度失分　後防唔集中成隱憂

集多媒體分析、最強資料庫及第一手資訊於一身，即上《彩報》：https://win.on.cc/football/video.html　

周日（24日）韓職雙料娛樂，開咧兩連勝嘅蔚山現代，雖有射手祖利亞尼加奧連續3場有入波，但喺主場只能逼和釡山偶像1:1，今季聯賽首度失分，跌落第2位，其中近兩仗均先失守，後防唔集中問題存隱憂，隨時成為爭冠絆腳石。

至於頭場全北汽車主場對FC大邱，大邱易邊後換入老將丹恩奴域加強攻力，點知佢入場冇耐於後場扭失波，輾轉畀全北嘅梅里路漢歷基推向左路窄位抽射破網，69分鐘金珍洙斬入禁區，邦本宜裕勁頂畀門將崔英恩撲出不遠，趙圭成乘機執死雞得手，完場前雙方各有一人領紅被逐，最終全北輕取2:0，頭3戰全勝，壓過蔚山升上榜首。