專欄輪住嚟  孫銘謙,畀心機!

20200524
東網電視
更多新聞短片
孫銘謙(綠衫)今季表現非常搶鏡。     (資料圖片)
入行以嚟,自問都算係一個勤力同好少向上司Say No嘅體記,但其實都有唔鐘意做或者怕做嘅嘢。
之前凡有出名嘅外隊嚟香港,傳媒都會千方百計,希望可以做到獨家嘢、特別嘢,租埋同一間酒店、喺門口扮球迷、同球隊嘅帶街扮Friend都係方法嚟。最直接嘅,就係擺人喺酒店門口,一見有球星出嚟就跟,公司有安排到車同車手就梗係好,但人手緊張喺上嚟,截的士追都成日會發生。「大頭」係男人,加上影相有啲把握,所以就算無車牌,嗰時都會被安排去做夜晚嗰更嘅追踪,攞住枝大光圈鏡,坐喺同事架車度,一見有料到就追。好記得當年曼聯嚟香港,老細要我試吓跟高爾同約基,日光日白就話啫,夜晚都幾高難度。同埋人哋係球星,都知實有記者喺出面捕,仲會行正門出嚟再攬女咩!幾鑊食白果,最憎!
90年代入行,體記分得好清楚,一係本地足球,一係本地雜項,同外國有關嘅就係外電。好記得當時就算做完晨操做午練加埋夜波,由朝做到晚都唔會有怨言,但一旦多雜項嘢,要我客串一單我都唔願,因為我真係唔識。同嗰時成日覺得,雜行啲行家好嘈同好惡,好驚見到佢哋,哈!哈!
另外仲有樣到依家唔鐘意做嘅,就係寫啲事非、負面嘢,好似和富大埔咁,一早聽到好多嘢,好似遲出糧、唔出糧、出少糧,又或者邊個辭職、邊個唔玩等等,但寫呢啲嚟有咩意思?真係有大鑊嘢,球會自己會公布㗎啦!寫就寫啲正面啲嘅,「孫銘」去南韓試腳單嘢,聽講有啲進展喇,如無意外會喺8月起行,過去會試一隊K2球隊先,再睇情況會唔會試多一、兩隊。對於呢次嘅機會,「孫銘」就有咁嘅諗法:「去得成,試咗先,真係有球會要,先再諗出場同發展機會,同埋對我自己進步有冇幫助。當然仲要同屋企人商量,到時先再打算。」
「孫銘」畀心機,希望你8月成到行,祝你好運。
大頭