里昂仲未死心！要求總統下令重開法甲

集多媒體分析、最強資料庫及第一手資訊於一身，即上《彩報》：

https://win.on.cc/football/video.html　

法甲早前已經宣布腰斬今季賽事，並將冠軍頒畀巴黎聖日耳門，但里昂仍然未死心，公開呼籲法國總統馬克龍仿傚西甲，於6月重開聯賽。

接照法甲腰斬前成績，里昂僅排第7位，未能獲得下屆歐洲賽資格，令球會蒙受重大經濟損失，所以一直反對賽會以呢個成績腰斬聯賽，里昂、艾米恩斯、圖盧茲曾提出上訴，但上周五(22日)已經被駁回。

不過，由於西班牙首相桑切斯周六(23日)發表講話，確認西甲最快6月8日重開，里昂趁機向法國總統馬克龍「請願」，發表聲明話好歡迎桑切斯嘅決定，令西甲繼德甲之後，將成為歐洲第2個重開嘅主要聯賽，認為法甲都可以仿傚，並呼籲馬克龍展現法國偉大精神，同歐洲列強睇齊，讓球隊喺可控情況下復操，並重開賽事。

問題係法甲已經宣布腰斬，如果又突然重開，勢必招致其他球隊反對，睇怕馬克龍未必會睬里昂。里昂今季仲有歐聯要踢，16強首回合領先祖雲達斯1:0，如果想下季繼續踢歐聯，就要奪取今屆冠軍。