英超球星再爆醜聞　涉落藥迷姦女子

集多媒體分析、最強資料庫及第一手資訊於一身，即上《彩報》：

https://win.on.cc/football/video.html　

英超停擺期間不斷傳出性醜聞，繼車路士翼鋒赫臣奧杜爾上星期被控涉嫌強姦後，英國《每日星報》爆料話再有女子報警，聲稱喺一個派對入面被一名英超球員迷姦及輪姦，英國警方接報後已經展開調查，基於私隱條停，報案人同涉事球星嘅身份都未有被披露。

據報案女子表示，當時佢參加咗一個家居派對，地點係涉案球星租嘅一間大宅，而佢只係飲咗兩杯飲料後就不省人事，到第二朝醒番，發現自己同嗰位球星全裸瞓喺床上，而且腳上有爪痕，懷疑自己被唔止一個人強姦。據女子嘅朋友透露，事發後有神秘人致電，話女子飲嘅飲料畀人落藥。女事主報警後，警方同埋法醫官已經即時進行各種搜證。

喺英超暫停期間，唔少球員都捲入性醜聞，早前有心理醫生踢爆有英超球員因為「太悶」，竟然同「姨仔」偷食尋找刺激；曼城球星基爾獲加亦被爆舉行性派對玩「4P」；愛華頓前鋒摩斯堅恩早前亦喺屋企搞「艷舞Party」；車路士翼鋒赫臣奧杜爾上周被控涉嫌強姦，目前只係保釋外出。